Biz, Qırımtatarlar, siyasiy konyunkturanıñ tesadüfinen peyda olğan bir halq degilmiz. Biz, Qırımnıñ tamır halqı, Altın Ordadan, Qırım Hanlığından bugünlerge kelgen mirasqa saip olğan bir milletmiz. Biz, 1917-de İslâm aleminde ve Türk dünyasında birinci defa demokratik parlament qurğan, qorqunçlı sürgün devirimizde de dünyağa insan aq-uquqlarınıñ nasıl qorçalanacağını oğretken bir milletmiz. Bugün Birleşken Milletlerde temsil etilgen yuzden ziyade devletniñ ne özi, ne adı, ne milleti ortada yoq ekende Qırımtatarnıñ devletçiligi bar edi, milliy bayrağı yelpirey ve marşı (gimni) yañray edi. Bizim şanlı Kökbayrağımız, deren manalı “Ant Etkenmen” marşımız ve butün milliy simvollarımız öz menlik ve tarihımıznıñ eñ açıq belgileri olıp turalar.

 

Başqaları bizim böyle acaip tarihiy milliy mirasımızğa suqlanır eken, iç kimse bu eñ qıymetli miras ve simvollarımıznı esassız yerge çetke atuv aqqına malik degildir. Milliy marşımız “Ant Etkenmen”niñ deñiştirilüviniñ Milliy Qurultayımıznıñ kün tertibine alınğanını eşitkende balabandan balaban ayrette qaldıq. Bugünki künde milletimiz bir yaqtan öz vatanıña yañıdan tamır atuvğa kureşir eken, tarihınıñ iç bir devirinde olmağan dayın öz tilini ve medeniyetini coyuv telükesini yaşay. Eger bizler til ve medeniyetimizni coysaq, Allah qorçalasın, tarihtan da silinip ketecekmiz. Böyle real bir telüke milletimizniñ başında turar eken, kün tertibimiziñ birinci maddesi asıl bu olmaq kerektir. Amma bunıñ yerine asırlıq milliy marşımıznıñ deñiştirilüvini munaqaşa etsek tarih bizni aslı da bağışlamaz. İnsanlarımız şanlı milliy marşımıznı deñiştirmekni aqılğa ketirmek yerine, epsiden ogüne öz balalarına öz Qırımtatar tilinde laf etmek ve olarğa “Ant Etkenmen”niñ manasını añlatmaqnen borclıdırlar.

 

Sayısı milyonlarnen adam olğan Türkiyedeki Qırımtatar diasporası milliy marşımız olğan “Ant Etkenmen”niñ Antlı Şeitimiz Noman Çelebi Cihan yazğan original varyantınıñ bir kelimesiniñ bile deñiştirilüvine kesenkes qarşıdır. Bugünde bugün bütün Qırımtatar diasporası bu fikirde olğanını er vastanen köstergendir. Qırımtatar Milliy Qurultayınıñ urmetli delegatlarınıñ milliy tarihımızğa ve mirasımızğa aqaret manasına kelecek soñ derece yañlış bir qarar almaycaqlarına inanamız. Milliy Qurultay delegatlarımıznı Antlı Şeitimiz Noman Çelebi Cihannıñ ulu hatresini daa bir kere kötermege davet etemiz. Yüce Allah Vatanımızda şanlı Kökbayrağımıznı ebediy yelpiretsin, şerefli “Ant Etkenmen”imizni ebediy yañratsın, qutlı ezanımıznı toqtatmasın.

 

Qırım Dernegi Umumiy Merkezi

Qırım Dernegi Aqsaray Şubesi

Qırım Dernegi Amasya Şubesi

Qırım Dernegi Balıkesir Şubesi

Qırım Dernegi Ballıqpınar Şubesi

Qırım Dernegi Bandırma Şubesi

Qırım Dernegi Ceyhan Şubesi

Qırım Dernegi Çatalca Şubesi

Qırım Dernegi Çorlu Şubesi

Qırım Dernegi Gebze Şubesi

Qırım Dernegi Gönen Şubesi

Qırım Dernegi Ilğın Şubesi

Qırım Dernegi İstanbul Şubesi

Qırım Dernegi Qocaeli Şubesi

Qırım Dernegi Qonya Şubesi

Qırım Dernegi Mersin Şubesi

Qırım Dernegi Nigde Şubesi

Qırım Dernegi Seydişeer Şubesi

Qırım Dernegi Tekirdağ Şubesi

Qırım Dernegi Yalova Şubesi

Qırım Dernegi Nevşeer Vekilligi

Qırım Dernegi Ordu Vekilligi

Qırım Dernegi Manavğat Vekilligi