Balalarımıznıñ Bayramı Hayırlı Olsun!

Qıymetli balalarımız, qıymetli azalarımız…

“23 Nisan Ulusal Egemenlik ve Çocuk Bayramı”mız Hayırlı Olsun…

Dünyadaki balalarğa ediye etilgen ilk ve tek bayram oluv hususiyetini taşığan, uzun yıllardır halqara bir kimlik qazanğan bayramımıznı, ne yazıq ki bu yıl, em de 100-ünci yılında meydanlarda ve büyük tantananen qayd etip olamaymız. Aslında Şefiqa Gaspıralı Qadın İnisiyatifi olaraq azırlıqlarımıznı bitirgen edik. Qırım ve Kyivden kelecek balalarımıznı mındaki qardaşları evlerinde musafir etecek ve bayram quvançını beraber yaşaycaq ediler, amma qısmet degil eken. Bizler de koronavirus qırğınlığınıñ bütün dünyada şiddetnen devam etkeni sebebinden planlarımıznı deñiştirmege mecbur oldıq.

Tehnologiyanıñ daa da çoq ayatımızğa kirgen şu künlerde, elbette, nimetlerinden faydalanmaq kerek. Bu tüşüncenen qırğınlıq sebebinden evlerinden çıqamağan ve Türkiyege kelemegen balalarımıznıñ er birinden öz imkânlarınen çıqarğan videolarını istedik. Ana-babaları da öz imkânlarınen tırışıp bizge qol tuttılar. Olarğa Cıyın Ansambli ve Dernegimizniñ muzıka derslerine qatnağan qardaşları da qoşuldı. Böylece, balalarımız bu yıl 23 Nisan quvançını internet vastasınen sizlerge de yetiştirdi.

Pek yahşı bilemiz ki, balalarımıznı qayğırmaq, olarğa güzel bir ayat azırlamaq, aslında kelecegimizni sağlam temeller üstünde qurmaq manasına kelmektedir.

Eger bugün dünyanıñ dört bir tarafındaki milyonlarnen insan til, din, ırqına baqmadan, insaniy degerlernen bir-birini quçaqlasa, mında yıllardır dünya balalarınıñ bağ tutuv merkezi olğan 23 Nisannıñ payını körmemezlikke urmaq mümkün degildir.

Qıymetli dostlarımız, bugünniñ bizler içün başqa müim tarafı da Türkiye Büyük Millet Meclisiniñ qurulğan 1920 senesi 23 Nisannıñ aynı vaqıtta Dernegimizniñ merhum Reisi Dr. Ahmed İhsan Kırımlınıñ doğğan künü olmasıdır. Onı rahmetnen añar ekenmiz ümüt etemiz ki, kelecek yıllarda özü de bala ekimi olğan ve balalarnı pek sevgen merhum Reisimizniñ adını taşığan Umumiy Merkezimiz “Dr. Ahmed İhsan Kırımlı Sosyal Tesisi”nde balalarımıznen beraber şeñ, eglenceli, quvançlı ve renkli bir müitte bu güzel bayramnı qayd etermiz.

Sağlam, bahtlı, tınç yarınlar isteklerimiznen bir kere daa kelecegimizniñ teminatı olğan balalarımıznı “23 Nisan Ulusal Egemenlik ve Çocuk Bayramı”nen tebriklep, sizlerni videolarımıznı seyir etmege davet etemiz.

Şefiqa Gaspıralı Qadın İnisiyatifi